Donostiako Udala / Ayuntamiento de San Sebastián

Gipuzkoako Foru Aldundiak kanpaina bat jarri du abian emakumeen eta gizonen arteko desberdintasunen gainean konzientzia hartzeko

Irungo eta Hondarribiko alardeak, emakumeen sarrera debekatzen duten elkarte gastronomikoak edo emakumeak familia-zaintzaile rolarekin jarraitzea oraindik ere; horra zenbait adibide

Aurkeztutako kanpainak, zenbait baliabideren bidez –kartelak, sare sozialak, web orriak, eta abar– gaiaren inguruan kontzientziatzea eta sentsibilizatzea du helburu, eta horretarako gaur egun gure Lurraldean gertatzen diren bidegabekeria mingarrienetako batzuen gainean indar egiten du. Uda partean gaudenez eta Gipuzkoako herri askotan jai giroan gaudenez, ospakizunetan eta aisialdi giroan oraindik ere atzematen diren desberdintasunen gainean jarri dute arreta. Horrela, udaletxeetan, kultura zentroetan, emakume etxeetan eta bestelako zentro batzuetan, kartelak banatuko dira Irungo eta Hondarribiko alardeetan eta emakumeen sarrera debekatzen duten elkarte gastronomikoetan dagoen diskriminazioa salatzeko.

Horrez gain, begirada zabaldu nahi izan dute, eta agerian utzi, urtean 365 egunean gertatzen diren desberdintasun horiek, festetan eta ohiko gune sozialetan ere gertatzen direnak, ‘ohiko edo tradiziozko’ omen direnak eta, ondorioz, inork erreparatu gabe doazenak aurrera. Hartara, material grafikoa ere banatuko da, bertan zalantzan jartzen da adinekoen, adingabeen edo mendeko pertsonen zaintzan berdintasunik ote dagoen, edo salatzen ote diren emakumeek oraindik ere jasaten dituzten indarkeria eta beldurra, emakumeak kontrolatzeko elementu diren aldetik.

Kartel guztietan agertuko da lema bera: Berdintasuna: egiteko asko. Salatzen den diskriminazio bakoitzak bere lan ildoa du Gipuzkoako Foru Aldundian. Kanpainak sentsibilizazio lan hori indartu nahi du, lan horrek legealdi osoan zehar jarraituko baitu aurrera inplikaturik dauden gizarte agenteekin eta erakundeen lankidetzarekin.

- Berdintasunezko alardeak: hitzarmena Irungo alarde mistoarekin; erakundeen arteko elkarrizketa gatazka ebazte aldera; zenbait jarduketa gizartea sentsibilizatze aldera Gipuzkoako jai askotan berdintasunik ez dagoela oraindik; eta abar.

- Elkarte gastronomikoak: laguntza ematea beren herrietan elkarte gastronomikoetan berdintasunezko partaidetzaren aldeko lan prozesuak artikulatzen ari direnei. Gai honi heltzeko lan ildo espezifikoa landuko da. Lehenengo fasea irailean hasiko da.

- Zaintzak: ikuspuntu feminista sartzea Foru Aldundiko Gizarte Politikako Departamentuan aurrera eramaten diren politiketan, bereziki mendekotasunaren arretaren alorrean.

- Indarkeria matxista: Beldur Barik erakunde arteko programaren bidez artikulatutako lan ildoari laguntzea. Programa hori gazteenei zuzendua dago, eta helburua da emakumeen aurkako indarkeria prebenitzea. Horretarako zenbait lanabes jartzen dira haien eskura, indarkeria hori identifikatzeko eta beren burua defendatzeko. Berdinbidean sarea garatzea udal txikiak indarkeriaren aurkako politiketan languntzeko. Besteak beste, Prestakuntza Plan bat abiaraztea, Foru Aldundiko Gaztedia Zuzendaritzarekin batera, emakumeen aurkako indarkeriaren prebentzioaren gainean.

Komunikazio eta harreman kanal bat

Kanpaina honen barruan, nabarmendu behar da emakumeekiko komunikazio eta harreman kanal bat sortu dela: berdintasuna.tv, webgune bat talde feministetan, udaletan eta emakume elkarteetan, Gipuzkoan eta baita kanpoan ere, egiten den lan guztiaren berri emateko.